táspi

Atlıq. Gónergen sóz.

1. Allanı kótermelep, maqtap oǵan shúkirkik qılıp aytılatuǵın sózler, duwalar.
2. Zikir hám tápsi sózlerin sanap aytıw ushın, ádette qurma shańǵalaǵınan, ryabina aǵashına islengen, otız úsh yáki toqsan toǵız túyme dúzilgen hám eki bası birge baylanǵan jip, dizbe yaǵniy diniy adamlardıń qolına uslap sanap otıratuǵın qatara jipke ótkerilgen monshaqlar dizbegi. Namazdı oqıp bolǵan soń, Qoynındaǵı táspisin, Ol qolına alǵandı (<<Qoblan>>). Bir nárselerdi bıdırlap - bıdırlap oqıdı da qolındaǵı táspisin taslap jumǵan kózin ashpastan basın joqarı kóterip <<Áwmin>>- dedi ( Á. Shamuratov). Eshniyaz axunnıń táspisin kórdim (T. Qayıpbergenov). Qollarında tayaq, bileginde táspi, monshaqlar (K. Sultanov). Táspi tartıw- Allaǵa jalbarınıp, tilek tilew. Ákesi tómen qarap táspi tartıp ele tabjılmay otır eken (Ǵ. Mustafin).