tártip

Atlıq

Belgili bir jámiyet penen shólkem aǵzalarına belgilengen rejim, qaǵıyda. Eskertilgen tártip boyınsha jótelmesten, pıshıq júris penen toǵızınshı qabatqa shıqtıq. Tekseriwshi oqıwshılardı tártipke shaqırǵanday, ruchkası menen stoldı tıqıldattı (M. Nızanov).

Temir tártip- qattı, qatań. Záleli joq, armiyanıń atı armiya! Temir tártip (M. Nızanov). Jabayı tártip- jónsiz, óreski, ersi, turpayı, jat.

Kún tártibi- jıynalısta qaralatuǵın, talqılanatuǵın másele. Jıynalıstıń kún tártibine ahmiyetli máseleler qoyıldı.

Tártip beriw- bir nárseni islewge buyrıq beriw.

Tártip buzıw- belgili qáliptegi rejeni saqlamaw.

Tártipke keltiriw- jónge túsiriw, retlew. Siz áwele qaramaǵıńızdaǵı adamlarǵa eskertińiz, búgin tiyisli qaǵazların retlep tártipke keltirip qoysın (N. Ǵabdullin).

Tártipke salıw- jónge keltiriw, retlew.

... Misli oǵan biziń respublika turmısın iynesinen sabaǵına deyin izertlew tapsırılǵan da, al ol bolsa usı mısalda putkil dúnyanı tártipke salıw ushın bel baylaǵan ilahiy perishtege usar edi (M. Nızanov).

Tártipke túsiw- jónge túsiw. Jóni kelse ol da tártipke túser edi (J. Moldaǵaliev).

Tártipke shaqırıw- tártipli bolıw kerekligin eskertiw, aytıw. Májilis baslıǵı Úrpek jurttıń dıbırlaǵan sózin toqtatıp, tártipke shaqırdı (B. Maylin).

Tártip ornatıw- belgili bir rejeni, tártipti qáliplestiriw, jónge túsiriw, retke keltiriw. Jańa direktor ay sayın mal esabın alıp, kiris-shıǵısların qattı qadaǵalap otıratuǵın tártip ornattı (Q. Serikbaev).

Tártip saqlaw- qáliplesken tártipti buzbaw, ádep saqlaw. Qáne tártip saqlap, tınısh turıp, gúres qızıǵın kórińiz (Q. Salǵarin).