nur

Atlıq

Bizdi qorshaǵan dúnyadan kóz arqalı qabıllanatuǵın, sáwle, jarıq, shuwaq. Quyash jarqırap óziniń altın nurın jerge tógip turǵanı bolmasa, búgingi ayaz keshegiden beterirek (T. Qayıpbergenov). ♦ Nur quyıw – nur tógiw, nurlandırıw. Kókte quyash nur quyǵanda kúlimlep, Birte-birte kókshil dóngen say-sala (I. Yusupov). Nur shashıw – jaqtı beriw, jaqtılandırıw, nurlandırıw. Nur quyash – nurlı quyash, quyashtıń nurı, shuwaq. Meniń gózzal watanımnıń jerine, Nur quyashın shashtı baxıt báhári (J. Aymurzayev). Nur tamıw – awıs. nur quyıw, nur jawıw. Júzinen nur tamǵan sulıw sımbatlı, Sonday atı shıqqan qızǵa bar, balam (A. Dabılov). Nur tógiw – awıs. kúsh quwat beriw, baxıt beriw. Oktyabrdiń ullı bayramın, Tabıs penen toylaymız hár jıl, Qartayǵanda nur tókken tańım, Oktyabrim — zor mereke bul (T. Seytjanov). Nur qaplaw – awıs. nurǵa bóleniw, nur tógiw. Nur qapladı «Qırq qızdıń» sol «qalasın», Baǵıp turǵan mınaw bozdıń dalasın (T. Seytjanov). Nur jawıw – jaqsılıq bolıw, iygilik bolıw. Nur jaynaw – jadıraw, jarqıraw.