eńkeyiw

Qaraqalpaqsha (kaa)

Morfologiyalıq hám sintaksislik qásiyetleri

feyil, eń-key-iw

Leksikalıq mánileri

1. Iyiliw, búgiliw, basın tómen alıw. • Bulardıń ishinen Erimbet boy tikley almay eńkeye berdi (K. Ayımbetov)....eńkeygen ǵarrı, eńbeklegen jas, jetim-jesir, ǵárip-qáser kóp edi jurtımda («Máspatsha»).
2. Kúnniń, aydın, juldızdıń uyasına qaray jaqınlawı, batıwǵa aylanıw. • Quyash batısqa qaray eńkeymekte (Ó. Ayjanov). Kún eńkeyip qalǵanlıqtan jer betinde buldır sáwle oynap júr edi (Q. Smamutov). Bul gózzal qalanıń sulıw kelbetiń bir men emes, kún eńkeyip súygendey (B. Qayıpnazarov).
3. Tómenlew, qulaw. • ...qamıs qoralardıń da túbi shirip, eńkeyip qulaw aldında tur... (K. Sultanov).

Derekler

1. QARAQALPAQ TILINIŃ TÚSINDIRME SÓZLIGI. Jeti tomlıq. Nókis, «Qaraqalpaqstan» baspası, 2023-jıl.